သမိုင်းဖြစ်စဥ်

၂၀၂၁ ခုနှစ်၊ ဖေဖော်ဝါရီလ ၁ ရက်နေ့

အကြမ်းဖက်စစ်ကောင်စီသည် နိုင်ငံသားများ အားလုံး၏ အထွတ်အထိပ်နေရာရရှိသော နိုင်ငံတော်သမ္မတ ဦးဝင်းမြင့်နှင့် နိုင်ငံတော်၏ အတိုင်ပင်ခံပုဂ္ဂိုလ် လူထုခေါင်းဆောင် ဒေါ်အောင်ဆန်းစုကြည် အပါအဝင် နိုင်ငံရေးရာထူး လက်ရှိ ဖြစ်သူများနှင့် ဒီမိုကရေစီနည်းလမ်းတကျ လွတ်လပ်မျှတပြီး ဥပဒေနှင့်အညီ ပွင့်လင်း မြင်သာစွာ ရွေးကောက်တင်မြှောက်ထားသည့် လွှတ်တော်ကိုယ်စားလှယ်များကို ဥပဒေမဲ့ ဖမ်းဆီးခဲ့ပြီး စစ်အာဏာသိမ်းမှုကို ကျူးလွန်ခဲ့ပါသည်။

၂၀၂၁ ခုနှစ်၊ ဖေဖော်ဝါရီ ၅ ရက်နေ့

ရွေးကောက်ခံလွှတ်တော်ကိုယ်စားလှယ်များဖြင့်ပြည်ထောင်စုလွှတ်တော်ကိုယ်စားပြုကော်မတီ (CRPH - Committee Representing Pyidaungsu Hluttaw) ကို ဖွဲ့စည်းခဲ့ပြီး ဥပဒေပြုရေးမဏ္ဍိုင်၏ လုပ်ငန်းတာဝန်များကို စတင် အကောင်အထည် ဖော်ဆောင်ရွက်ခဲ့ပါသည်။

၂၀၂၁ ခုနှစ်၊ မတ်လ ၈ ရက်နေ့

စစ်အာဏာရှင်စနစ် အပါအဝင် အာဏာရှင်စနစ်မှန်သမျှ ချုပ်ငြိမ်းရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေး ရည်မှန်းချက်များဖြင့် အမျိုးသားညီညွတ်ရေးအတိုင်ပင်ခံကောင်စီ (NUCC – National Unity Consultative Council) အား အကြမ်းဖက်စစ်ကောင်စီကို ဆန့်ကျင်သည့် အင်အားစုများဖြင့် ကနဦး စုဖွဲ့မှုပြုကာ စတင်ခဲ့ပါသည်။

၂၀၂၁ ခုနှစ်၊ ဧပြီလ ၁၆ ရက်နေ့

အမျိုးသားညီညွတ်ရေးအစိုးရ (NUG - National Unity Government) ကို စတင်ဖွဲ့စည်းခဲ့ပြီး အုပ်ချုပ်ရေးမဏ္ဍိုင်၏ လုပ်ငန်းတာဝန်များကို စတင် အကောင်အထည်ဖော် ဆောင်ရွက်ခဲ့ပါသည်။

၂၀၂၂ ခုနှစ်၊ နိုဝင်ဘာလ ၂ ရက်နေ့

တရားရေးဝန်ကြီးဌာနရှိ နိုင်ငံ့ဝန်ထမ်း၊ စေတနာ့ဝန်ထမ်းနှင့် အကြံပေးပုဂ္ဂိုလ်များ အားလုံး၏ အကြိမ်ကြိမ် ဆွေးနွေးအကြံပြုချက်များအပေါ် အခြေခံပြီး “တရားရေးဝန်ကြီးဌာန၊ စီမံခန့်ခွဲရေး ကော်မတီ” က ဆွေးနွေးဆုံးဖြတ်ခဲ့သည့် တရားရေးဝန်ကြီးဌာန၏ “လုပ်ငန်းတာဝန်နှင့် ဖွဲ့စည်းပုံ” ကို အမျိုးသားညီညွတ်ရေးအစိုးရ၊ တရားရေးဝန်ကြီးဌာန၊ ပြည်ထောင်စုဝန်ကြီးက (၂.၁၁.၂၀၂၂) ရက်နေ့ တွင် အတည်ပြုပြဋ္ဌာန်းခဲ့ပါသည်။